Президент Алмазбек Атамбаевдин Казакстанга сапарынын жыйынтыктары

2015-жылынын 15-16-октябрында  Кыргыз Республикасынын Президенти Алмазбек Атамбаевдин Казакстан Республикасына сапары болду.

Евразиялык экономикалык комиссиянын мүчөлөрүн Президенттик белек сааттар менен сыйлоо

Кыргыз Республикасынын Президенти Алмазбек Атамбаев 2015-жылдын 15-октябрында Казакстан Республикасына жасаган иш сапарынын алкагында Бурабай  поселогунда евразиялык интеграциялык процессинде Кыргызстандын кызыкчылыктарын  илгерилетүүгө кошкон  жеке  салымы  үчүн Евразиялык экономикалык комиссиянын мүчөлөрүн Кыргыз Республикасынын Президентинин белек сааттары менен сыйлады.

Мамлекет башчысы Евразиялык экономикалык комиссиянын (ЕЭК) интеграциянын негизги багыттары жана макроэкономика боюнча Коллегия мүчөсү (министр) Татьяна Валовага, ЕЭКтин техникалык жөнгө салуу маселелери боюнча Коллегия мүчөсү(министр) Валерий Корешковго, ЕЭКтин соода боюнча Коллегия мүчөсү(министр)  Андрей Слепневго жана ЕЭКтин экономика жана финансылык саясат боюнча Коллегия мүчөсү(министр)  Тимур Сулейменовго белек сааттарды тапшырды.

Президент Алмазбек Атамбаев сыйлык ээлерине өндүрүмдүү иши үчүн ыраазычылык билдирип, евразиялык интеграция процессинин бардык катышуучуларынын кызыкчылыктарын көздөп, мындан ары да кызматташабыз деген ишенимин билдирди.

Мындан тышкары, Президент Алмазбек Атамбаевдин ушул эле буйругу менен ЕЭКтин бажы кызматташуу боюнча Коллегия мүчөсү (министр) Владимир Гошин, ЕЭКтин бажы-тарифтик жана тарифтик эмес жөнгө салуу департаментинин директору Виталий Гудин, ЕЭКтин бажы инфраструктурасынын директору Владимир Скиба, ЕЭКтин финансылык саясат департаментинин директору  Бемба Хулхачиев Президенттин белек сааттары менен сыйланды.

 

Көз карандысыз Мамлекеттер Шериктештигине мүчө мамлекет башчыларынын кеңешинин тар чөйрөдөгү жыйынына катышуу

Кыргыз Республикасынын Президенти Алмазбек Атамбаев Казакстан Республикасына жасаган иш сапарынын алкагында Көз карандысыз Мамлекеттер Шериктештигине мүчө мамлекет башчыларынын кеңешинин тар чөйрөдөгү жыйынына катышты. Жыйын Бурабай поселогунда өткөрүлдү.

Биргелешип сүрөткө түшүү аземинен кийин Мамлекет башчылары КМШга мүчө мамлекет башчыларынын кеңешинин тар чөйрөдөгү жыйынына катышуу үчүн залга бет алышты.

Жыйынды ачып жатып, Казакстандын Президенти Нурсултан Назарбаев  Кыргызстанды, анын  Президенти катары Алмазбек Атамбаевди биринчи жолуу туруктуу кырдаалда  өткөн Жогорку Кеңешке депутаттарды шайлоонун ийгиликтүү өтүшү менен куттуктады. “Эл өзүнүн кеменгерлигин көрсөтүп, тынч мамлекетте жашагысы келээрин далилдеди.  Жогорку Кеңештин жаңы чакырылышы интеграциялык процесстерди өнүктүрүүгө өз салымын кошот деп ишенем”,-деди Нурсултан Назарбаев.

Президент Алмазбек Атамбаев өз сөзүндө Кыргызстан  интеграцияны маанилүү фактор катары эсептеп, Шериктеш өлкөлөрүнө күн тартибин жана приоритеттерди учурдун жаңы талаптарына ылайыкташтырууну сунуш кылаарын баса белгиледи. ”Мына ушуга байланыштуу  бүгүнкү жыйында  КМШнын мамлекет башчыларынын  эл аралык терроризмге каршы күрөш жөнүндө Билдирүүсүн кабыл алуу зарыл деп эсептейбиз”,- деди Алмазбек Атамбаев.

Мамлекет башчысынын айтымында, Кыргызстан 2016-жылы КМШга төрагалык кылчу мамлекет катары  КМШ өлкөлөрүнүн кызыкчылыктарына төп келген ишти улантууну колго алып, өз ара пайдалуу кызматташууну ырааттуулук менен чыңдоо принциптерин катуу сактамакчы.

“Биз Шериктештикке төрагалык кылуунун тиешелүү Концепциясынын долбоорун даярдап койдук. Үстүбүздөгү жылдын декабрь айында Концепция белгиленген тартипте расмий түрдө сунушталат. 2016-жылы Бишкекте КМШнын юбилейлик Саммитин өткөрүү боюнча сыймыктуу милдет бизге туш келди. Шериктештиктин түзүлүшүнүн 25 жылдыгына байланыштуу Билдирүү Саммиттин негизги маселеси  болот”,-деди Алмазбек Атамбаев.

“Бул жыйынды биз 2016-жылдын 16-сентябрында Бишкек шаарында өткөрүүнү сунуш кылабыз”,-деди Алмазбек Атамбаев.

Мамлекет башчысы Кыргызстан тең төрагалык кылуучу Казакстан жана Россия менен бирдикте 2016-жылы Шериктештикке төрагалыкты үзүрлүү өткөрүү үчүн бардык күч аракетин жумшайт деп ишендирди.

Сөзүнүн соңунда Президент Алмазбек Атамбаев Казакстандын Президенти Нурсултан Назарбаевке төрагалык кылган мезгилде Шериктештиктин ишине натыйжалуу жетекчилик кылгандыгы үчүн ыраазычылык айтып, бүгүнкү жыйындын жыйынтыктары КМШнын алкагында өлкөлөрдүн өз ара кызматташуусун  мындан ары чыңдоого өбөлгө болот деген ишенимин билдирди.

 

Көз карандысыз Мамлекеттер Шериктештигине мүчө мамлекет башчыларынын кеңешинин кеңири курамдагы жыйынына катышуу

Кыргыз Республикасынын Президенти Алмазбек Атамбаев Казакстан Республикасына жасаган иш сапарынын алкагында  Көз карандысыз Мамлекеттер Шериктештигине мүчө мамлекет башчыларынын кеңешинин кеңири курамдагы жыйынына катышты. Жыйын Бурабай поселогунда өткөрүлдү.

Мамлекет башчылары  БУУ түзүлгөндүгүнүн 70 жылдыгына байланыштуу билдирүү, ошондой эле Чернобыль АЭСиндеги авариянын 30 жылдыгы боюнча кайрылуу кабыл алышты. Мындан тышкары Мамлекет башчыларынын кароосуна коюлган бир катар эл аралык документтерге кол коюлду.

Жыйындын жүрүшүндө Мамлекет башчылары  2016-жылы КМШга Кыргыз Республикасынын төрагалык кылуусу жөнүндө чечим кабыл алышты, ошону менен бирге КМШнын мамлекет башчыларынын кеңешинин кийинки жыйынын 2016-жылдын 16-сентябрында өткөрүү тууралуу Президент Алмазбек Атамбаевдин сунушун колдоого алышты.

Ушуну менен КМШнын катышуучу-мамлекет башчыларынын кеңешинин жыйыны өз ишин аяктады.

 

Евразиялык Жогорку Экономикалык Кеңешинин катышуучу-мамлекет башчыларынын тар чөйрөдөгү жыйынына катышуу

Кыргыз Республикасынын Президенти Алмазбек Атамбаев Казакстан Республикасына жасаган иш сапарынын алкагында  Бурабай поселогунда өтүп жаткан Евразиялык Жогорку Экономикалык Кеңешине мүчө мамлекет башчыларынын тар чөйрөдөгү жыйынына катышты.

Биргелешип сүрөткө түшүү аземинен кийин Мамлекет башчылары Евразиялык Жогорку Экономикалык Кеңешинин катышуучу-мамлекет башчыларынын  тар чөйрөдөгү жыйынына катышуу үчүн залга бет алышты.

Тар чөйрөдө жолугушуу аяктагандан кийин Евразиялык Жогорку Экономикалык Кеңешине мүчө мамлекет башчыларынын жыйыны кеңири курамда  уланат.

 

Евразиялык Жогорку Экономикалык Кеңешине мүчө мамлекет башчыларынын жыйынына катышуу

Кыргыз Республикасынын Президенти Алмазбек Атамбаев Казакстан Республикасына жасаган иш сапарынын алкагында Бурабай поселогунда өткөн Евразиялык Жогорку Экономикалык Кеңешине мүчө мамлекет башчыларынын жыйынына катышты.

Евразиялык экономикалык бирликти мындан ары өнүктүрүүнүн эң актуалдуу маселелери талкууланган Евразиялык Жогорку Экономикалык Кеңешинин мамлекет башчыларынын  тар чөйрөдөгү жыйынынан кийин жолугушуу кеңири форматта улантылды.

Беларусь Республикасынын Президенти Александр Лукашенко Евразиялык экономикалык бирликтин(ЕАЭБ) катышуучу-мамлекет башчыларынын тар чөйрөдөгү жыйынынын жүрүшүндө Кыргызстандын Президенти  Алмазбек Атамбаевдин сунушу боюнча  Кыргызстандын ЕАЭБ кошулуусуна жана бул кадамдын натыйжалуулугуна байланыштуу маселелер талкуулангандыгын белгиледи. “Тар чөйрөдөгү жыйында  Россия жана Казакстан  Кыргызстан менен чек арада абдан кылдаттык менен иш жүргүзүп, өлкөнүн эли ЕАЭБ кошулуудан пайда болоорун сезгидей жумуштарды жасашат деген чечим кабыл алынды”,-деп баса белгиледи Александр Лукашенко.

Кеңири курамдагы жыйындын жүрүшүндө Мамлекет башчылары Евразиялык экономикалык бирлик менен Евразиялык экономикалык комиссиясынын башка өлкөлөр менен өз ара аракеттенишүүсүнүн тартибин аныктаган бир катар документтерге кол коюшту.

Андан тышкары, Мамлекет башчылары  кызмат көрсөтүүлөрдүн тизмесин бекитти. Ал тизменин негизинде  ЕАЭБ  кызмат көрсөтүүнүн бирдиктүү рыногун калыптандыруу  либерализациялоо боюнча пландарга ылайык ишке ашырылат.

Евразиялык Жогорку Экономикалык Кеңешинин катышуучу-мамлекет башчыларынын жыйыны аяктаары менен, Президент Алмазбек Атамбаев баштаган  делегация бүгүн Бишкекке кайтып келет.

27-октябрь, 2015-жыл
Басып чыгаруу