Сайттан издөө
Сайттан издөө
Кыргыз Республикасынын Президенти

Президент Алмазбек Атамбаев кыргызстандыктарды Жаңы 2013-жыл менен куттуктады

Бүгүн, 2012-жылдын 31-декабрында, Кыргыз Республикасынын Президенти Алмазбек Атамбаев кыргызстандыктарды Жаңы 2013-жыл менен куттуктады.

Куттуктоонун тексти:

 “Урматтуу мекендештер!

Бир аздан кийин эски жылды узатып, Жаңы жылды тосуп алабыз.

2012 - жылы көп сыноолордон өттүк. Бирок, кандай болсо да эң негизгиси - өлкөбүздө туруктуулук сакталып, алдыга кадам таштаганга шарттар түзүлдү.

Тарыхты карасак, ийгиликке биримдиги бар өлкөлөр гана жетишкен. Согушта талкаланып, тизелеп калган Япония менен Германия, элинин күжүрмөн эмгеги менен гүлдөгөн өлкөлөргө айланышты.

Биз болсо кагаз түрүндө көз карандысыз болгонубуз менен, иш жүзүндө 20 жылдан бери бутка тура албай жатабыз.

Учурда элибиздин турмушу жеңил эмес. Кээде свет менен газ өчүп жатат. Майрамдык дасторконду даярдоо деле айрым үй-бүлөлөр үчүн оңой болгон жок.

Бирок, мен ишенем, өлкөбүздүн келечеги кең! Акылман жана сабырдуу элибиз бар. Бул биздин байлыгыбыз. Биз азыр өз күчүбүзгө гана ишенишибиз керек!

Тагдыр бизге дагы бир мүмкүнчүлүк берип жатат. Өнүккөн, күчтүү Кыргызстанды курууга мүмкүнчүлүк берип жатат.

Маңдай тери менен нан тапкан, өз күчү менен үй-бүлөсүн баккан иштерман адамдарды колдоого тийишпиз. Кыргызстандын накта каармандары ошол жөнөкөй күжүрмөндөр болуш керек.

Иштей турган мезгил келди! Бир гана эмгек Кыргызстанды өнүгүү жолуна салат. Ошондуктан Кыргызстанда 2013-жыл Иштерман жылы деп жарыяланды.

Ардактуу мекендештерим!

Өзүм чоң ата болуп калсам дагы, менде балалык кездегидей, жакшылыкка, жаңы жылдык кереметке ишеним жашап келет. Жакшылык сөзсүз жамандыкты жеңет. Жалганды сөзсүз чындык жеңет. Ушул ишеним мага күч-кубат, дем берип, жылдан жылга ээрчитип баратат.

Келе жаткан Жаңы 2013-жылды да мен зор үмүт менен, ишеним менен тосуп жатам.

Келе жаткан жылы баарыбыздын үмүт-тилегибиз ишке ашсын!  Элибизди, жерибизди

Кудай колдосун, тынчтык жана бейпилдик берсин!

Кудайым элибизди, жерибизди жамандыктан, бөөдө кырсыктан сактасын!

Баарыбызга бак-таалай, чың ден соолук, ийгилик каалайм!

Бар бололук, бир бололук!

Жаңы жылыңыздар менен!

Кыргыз Республикасынын

Президенти                                                                                                 Алмазбек Атамбаев”

 

2012-жыл 31-декабрь