Сайттан издөө
Сайттан издөө
Кыргыз Республикасынын Президенти

Президент Алмазбек Атамбаев Армения, Белоруссия, Россия жана Тажикстан мамлекеттеринин башчыларынын бейформалдуу жолугушуусуна катышты

Бүгүн, 2014-жылдын 8-майында, Кыргыз Республикасынын Президенти Алмазбек Атамбаев Россия Федерациясынын Москва шаарында өткөрүлгөн Армения Республикасынын, Беларусь Республикасынын, Россия Федерациясынын жана Тажикстан Республикасынын мамлекет башчыларынын бейформалдуу жолугушуусуна катышты.

Мамлекет башчысы Армениянын Президенти Серж Саргсян, Беларусь Республикасынын Президенти Александр Лукашенко, Тажикстан Республикасынын Президенти Эмомали Рахмон менен бирге Россия Федерациясынын Президенти Владимир Путиндин  жетекчилиги алдында өткөрүлгөн Россия Федерациясынын Куралдуу Күчтөрүн башкаруу боюнча машыгууларга катышты.

Андан соң Алмазбек Атамбаев Мамлекет башчыларынын бейформалдуу жолугушуусуна катышты. Өз сөзүндө Президент Алмазбек Атамбаев Армениянын, Белоруссиянын, Россиянын жана Тажикстандын Президенттерин, ушул өлкөлөрдүн элдерин келе жаткан майрам – Жеңиш күнү менен куттуктады. Мамлекет башчысы совет элинин Улуу Ата Мекендик согуштагы жеңишинин маанисин баса белгиледи. “Өлкөлөр эгемендүүлүккө жетишти, биз көз карандысыздыкты көздүн карегиндей сактайбыз. Ошол  эле учурда биз өлкөлөрүбүздүн ортосундагы чек аралар достуктун жана бир туугандыктын чек арасына айланышы үчүн бардык күч аракетибизди жумшоого тийишпиз”,- деди Алмазбек Атамбаев.

Глобалдуу процесстерге, эл аралык абалдын күн тартибиндеги маселелерге токтолуп келип, Мамлекет башчысы дүйнөлүк лидерлер жана саясатчылар өз өлкөлөрүнүн жарандарынын алдындагы зор жоопкерчиликти сезип, тирешүүгө жана ар кандай принциптер боюнча элдердин бөлүнүүсүнө жол бербөөгө милдеттүү экендигин баса белгиледи.

Алмазбек Атамбаев маданий-гуманитардык чөйрөдө өлкөлөр ортосундагы байланыштарды жандандыруу, келерки жылы майрамдала турган Улуу Ата Мекендик согуштагы Жеңиштин 70 жылдыгын майрамдоого жакшы даярдык көрүү зарылчылыгын баса белгиледи.

Ошону менен бирге Президент Алмазбек Атамбаев кесиптештерин региондогу коопсуздукка шек келтирген коркунучтарга жол бербөө үчүн биргелешкен аракеттерди жасоого чакырды.

Мындан тышкары жолугушуунун жүрүшүндө Мамлекет башчылары регионалдык коопсуздукту чыңдоо боюнча мындан аркы кадамдарды, өлкөлөрдүн тышкы саясат ведомстволордун ортосунда тыгыз өз ара кызматташуусун камсыз кылуу маселелерин талкуулашты.

2014-жыл 8-май