Президент Алмазбек Атамбаевдин колдоосу астында 1916-жылдагы трагедиялуу окуяларга арналган «Өмүр көчү-100» автожүрүш сапар алды

Кыргыз Республикасынын Президенти Алмазбек Атамбаевдин колдоосу астында бүгүн, 5-августта 1916-жылдагы трагедиялуу окуяларга арналган «Өмүр көчү-100» автожүрүш сапар алды.

Сокулук районунун Асыл-Баш айылынын сапар тарткан автожүрүш мамлекеттик деӊгээлде өткөрүлөт. Автожүрүш башталган иш чарага  Кыргыз Республикасынын Президентинин Аппаратынын жетекчисинин орун басарынын даражасындагы бөлүм башчы Мира Карыбаева катышып, Мамлекет башчысынын автожарыштын катышуучуларына кайрылуусун жарыялады. 

Автожүрүш Асыл-Баш, Беловодское айылдарына, Боом капчыгайына, Бөкөнбаев, Барскоон айылдарына токтоп өтөт. Андан ары 6-августта Каракол шаарын жана Түп райондорун аралайт.

Төмөндө Кыргыз Республикасынын Президенти  Алмазбек Атамбаевдин  1916-жылдагы трагедиялуу окуяларга арналган «Өмүр көчү-100» автожүрүштүн катышуучуларына кайрылуусунун толук текстин жарыялайбыз.

«Урматтуу мекендештер!

Жүрүштүн ардактуу катышуучулары!

Быйыл Кыргызстандын тарыхында  өзгөчө орунду ээлеген улуттук-боштондук көтөрүлүштүн жана андан кийин болгон, элдин эсинде «Үркүн» деп аталып калган каргашалуу окуянын 100 жылдыгын мамлекеттик деңгээлде белгилеп жатабыз.

Өткөн 100 жыл ичинде бул окуя ар кандай деңгээлде эскерилип келген. Алсак, 1931-жылы дал ушул күндөрү элдин көсөмдөрү болушкан Жусуп Абдырахманов менен Баялы Исакеевдер Үркүндүн 15 жылдыгын белгилөөнү колго алып, жалпы элдин мүдөөсүн орундатышкан.

Андан кийинки мезгилде бул маселени 60 жыл бою элдин эсинен чыгарууга аракеттер жасалган.

Эгемендикке ээ болгон күндөн тарта коомчулуктун активдүү өкүлдөрү жана жигердүү жаштар ата-бабалардын алдындагы ыйык парзды аткаруу максатына элдин көңүлүн бурууга аракеттерин жасашкан.

Алгач, кайра куруунун желаргысы менен 1991-жылы белгилүү коомдук уюмдар жана мекенчил жаштар биригип, «Өмүр көчү-75» жөө жүрүшүн уюштурушкан. Бул иш-чара өз кезегинде өтө маанилүү жана ошол эле учурда кооптуу дагы болчу. Ал эми, 2006-жылы Үркүндүн 90 жылдыгында, бийик ашууларда калган сөөктөрдү диний жөрөлгөлөр менен жерге берүү милдети аткарыла башталды.

Эгемендиктин алгачкы 20 жылында бийлик тарабынан 1916-жылдагы окуялардын чыныгы тарыхый ордун жана мамлекеттүүлүктү түптөөдөгү маани-маңызын терең түшүнбөстөн улам, формалдуу иш-чаралар өткөрүлүп, совет доорундагыдай эле унчукпай коюу саясаты улантылган.

Быйыл, алгачкы жолу бул жүрүш мамлекеттик деңгээлде өткөрүлүп жатат. Ошондуктан «Өмүр көчү-100» демилгесине мамлекет тарабынан колдоо көрсөтүү туралуу жергиликтүү бийлик органдарына тиешелүү тапшырмалар берилди.

Учурда тарыхыбызга өзгөчө көңүл бурулуп, элибиздин улуттук аң-сезимин көтөрө турган демилгелер колго алынып жатат. Өзгөчө акыркы эки жылда 1916-жылдагы каргашалуу окуялардын 100 жылдыгына карата көптөгөн иш-чаралар өткөрүлүүдө. Окумуштуулар бул окуялардын ХХ кылымда мамлекеттүүлүгүбүздүн кайра жаралуусуна тийгизген таасири туралуу көптөгөн изилдөөлөрдү жүргүзүүдө.

Урматтуу мекендештер!

Быйыл, Тарых жана маданият жылында, Кыргыз Республикасынын эгемендигине 25 жыл толгондо ушул жүрүштүн өтүп жатышы өзгөчө мааниге ээ.

Демилгени көтөрүп, элдин тарыхый эс-тутумунда сакталышына салым кошуп, колдоп келе жаткан жигердүү жарандарыбыздын аракеттерин жогору баалайбыз. 

Бул «Өмүр көчү-100» жүрүшү мамлекеттүүлүгүбүздүн бекемделишине, элдин биримдигине дагы татыктуу деңгээлде өз салымын кошот деп терең ишенем. Биз ата-бабалардын, тарыхтын жана келечек муундун алдында мамлекетибизди жана эгемендигибизди көздүн карегиндей сактоого тийишпиз. Кудай бизге күчтүү көз карандысыз мамлекет курууга тарыхый мүмкүнчүлүк берди.

Жолуңар шыдыр, жолдошуңар Кыдыр болсун.

Ата-бабалардын алдындагы жооптуу милдетти татыктуу аткарып, эсен-аман кайтып келиңиздер».

5-август, 2016-жыл
Басып чыгаруу