Сайттан издөө
Сайттан издөө
Кыргыз Республикасынын Президенти

Президент Алмазбек Атамбаев Саха Республикасынын Мамлекеттик жыйынынын Төрагасы Александр Жирковду кабыл алды

Бүгүн, 2014-жылдын 14-ноябрында, Кыргыз Республикасынын Президенти Алмазбек Атамбаев залкар манасчы Саякбай Каралаевдин 120 жылдыгына арналган иш-чараларга катышуу үчүн өлкөбүзгө келген Россия Федерациясынын Саха Республикасынын (Якутия) Мамлекеттик жыйынынын (Ил Тумэн) Төрагасы, «Дүйнө элдеринин эпостору» эл аралык ассоциациясынын вице-президенти Александр Жирковду кабыл алды.

Жолугушуунун жүрүшүндө Александр Жирков Алмазбек Атамбаевге кыргыз элинин эпикалык чыгармаларын окуп үйрөнүү жана эл арасына жайылтуу ишине салым кошуп жаткан «Дүйнө элдеринин эпостору» эл аралык ассоциациясынын ишмердиги туурасында айтып берди. Тактап айтканда ал  «Дүйнө элдеринин эпостору» эл аралык ассоциациясынын колдоосу менен «Манас» эпосу якут тилине которулгандыгын кабарлады.

Саха Республикасынын Мамлекеттик жыйынынын Төрагасы «Манас» эпосунун жана манасчы Саякбай Каралаевдин чыгармачылыгынын дүйнөлүк маданият казнасы үчүн зор маанисин белгиледи. Александр Жирков Алмазбек Атамбаевге якут тилине которулган «Манас» эпосунун нускасын жана кыргыз тилине которулган «Ньургун Баатыр» якут олонхо-эпосун тапшырды.

Президент Алмазбек Атамбаев Александр Жирковго Кыргызстан элинин маданий мурасын окуп үйрөнүүгө жана эл арасына жайылтууга, ошондой эле илимий-маданий чөйрөдө элдерибиздин ортосунда мамилелерди чыңдоого кошкон салымы үчүн ыраазычылык билдирди.

2014-жыл 14-ноябрь