Президент Алмазбек Атамбаев: «Кесипкөйлүгү менен ийгиликтерге жетишип, өлкөгө эмгеги сиңгендерди мамлекет ар дайым колдоого тийиш»

Бүгүн, 15-октябрда “Ала-Арча” Мамлекеттик резиденциясында Кыргыз Республикасынын Президенти Алмазбек Атамбаевдин катышуусу менен Кыргызстан элинин тарыхый жана маданий мурастарын, республиканын социалдык-экономикалык, интеллектуалдык жана руханий потенциалын өнүктүрүүгө кошкон салымы, көп жылдык үзүрлүү эмгеги, каармандыгы жана эрдиги үчүн Кыргыз Республикасынын мамлекеттик сыйлыктары менен сыйлоо аземи болду.

Мамлекет башчысы өз кесибинин өтөөсүнө чыгып, башкаларга үлгү болгон, мамлекетибиздин өнүгүшүнө бараандуу салым кошуп жаткан адамдарга жогорку сыйлыктарды тапшыруу ал үчүн чоң кубаныч экенин белгиледи. 

“Сиздер мындан да жогорку сыйлыкка татыктуусуздар. Ар бириңиздер ак эмгек, адал мээнетиңиздер менен өлкө тынчтыгын, туруктуулукту жана көп улуттуу Кыргызстан элинин ынтымагын, биримдигин сактоого бараандуу салым кошуп жатасыздар”,- деди Алмазбек Атамбаев. Ал кесипкөйлүгү менен ийгиликтерге жетишип, өлкөгө эмгеги сиңгендерди мамлекет ар дайым колдоого тийиш экендигин баса белгиледи.

Президент жогорку сыйлыкты – II даражадагы “Манас”  орденин  Кыргыз Республика Президентинин Аппарат Жетекчисинин орун басары рангасындагы тышкы саясат бөлүмүнүн башчысы Сапар Исаковго тапшырды.

«Улуттук кызыкчылыктарыбызды коргоодо анын мага көрсөткөн жардамын жогору бааладым”, - деди Алмазбек Атамбаев.

Кыргыз Республикасынын ички иштер министринин орун басары, милициянын полковниги Данияр Абдыкаров «Эрдик» медалына татыктуу болду.

«Анын жетекчилиги менен коом ичинде талкуу жараткан бир катар кылмыштар кыска мөөнөттө ачылды”, - деди Мамлекет башчысы.

Сыйлангандардын катарында Кыргызстан жазуучуларынын “Литературный Кыргызстан” адабий-көркөм жана коомдук-саясый журналынын  башкы редактору Александр Иванов бар. Ал «Даңк» медалына татыды.

«Бул залдан көрүнүктүү жазуучу, көп жылдан бери өзүм билген жана досум Александр Иванович Ивановду көрүп, кубанып турам. Александр Иванович соңку 30 жылдан бери «Литературный Кыргызстан» журналын жетектеп келатат. Мен сиздин чыгармачылыкты да, биздин ортобуздагы мамилелерди да абдан баалайм”, - деди Мамлекет башчысы.

«Сыйлангандар арасында  «Даңк» медалына татыган  Халдар Нарматов бар. Ал  90-жылдардан бери Өзгөчө кырдаалдар министрлигинин Түштүк борборунда айдоочу болуп эмгектенет», - деп белгиледи Мамлекет башчысы.

Эмгеги жогорку мамлекеттик сыйлыкка татыктуу болгондордун арасында  “Город-312” тобунун солисткасы Светлана Назаренко бар, ал “Даңк” медалы менен сыйланды. Ал эми  «Азия-микс» КВН командасынын жетекчиси Элдияр Кененсаров “Кыргыз Республикасынын маданиятына эмгек сиӊирген ишмер” наамына ээ болду.

«Силердин чыгармачылык азыркы Кыргызстандын өзгөчө бренди болуп калды. Силер өлкөбүздү сыртка таанытып жатасыӊар. Эмгегиӊерди кандай мактасак да жарашат. Силер Кыргызстанда эле эмес, чет өлкөлөрдө да кеңири таанылдыӊар», - деп белгиледи Алмазбек Атамбаев.

Президент ошондой эле сыйлангандардын катарында өткөн кылымдын 70-жылдары кинематографиядагы “кыргыз кереметин” жаратууга өз салымын кошкон,  маданиятка эмгек сиңирген ишмер Артыкпай Сүйүндүковдунда бар экендигин белгиледи. Ал “Кыргыз Республикасынын эл артисти” наамын алды. 

«Биз сиздин эмгекти жакшы билебиз. Сүймөнкул Чокморов менен бирге айтылуу  “Караш-караш” фильминде тартылдыңыз”, - деди Президент Алмазбек Атамбаев.

Ж.Баласагын атындагы Кыргыз улуттук университетинин окутуучусу, профессор Кадыркул Даутов «Эл жазуучусу» ардактуу наамына ээ болду. «Сиздин көп жылдык жемиштүү чыгармачылыгыңыз жана илимий ишмердигиңиз жогорку мамлекеттик сыйлыкка татыктуу», - деп белгиледи Президент.

«Кыргыз Республикасынын Ардак баракчасы» мамлекеттик сыйлыгын Талас көмөкчү мектеп-интернатынын  директору Кенжалы Орозалиевге тапшырып жатып, Алмазбек Атамбаев ал 40 жылдык өмүрүн педагогдук ишке арнап келгенин белгиледи.

«Кенжалы Орозалиев жетектеген окуу жайында окутуу-тарбиялоо иши жана  материалдык-техникалык базасы жакшы жолго коюлган», - деди Президент.

Сөзүнүн аягында Президент Алмазбек Атамбаев көп жылдык эмгеги, өз ишине берилгендиги үчүн сыйлык ээлерине алкыш айтты.

«Сиздер сыяктуу кайраткер, күжүрмөн адамдар бар үчүн мекенибиздин келечеги кең.  Мен ар бириңиздерди терең урматтайм жана Кыргызстандын бакубатчылыгы үчүн эмгегиңиздерди жогору баалайм”,- деди Мамлекет башчысы.

Мамлекеттик сыйлыктар менен кошо Президент Алмазбек Атамбаев бардык сыйлык ээлерине 10 жана 20 миң сом өлчөмүндөгү акча каражаттарын тапшырды. Бул каражаттар Мамлекет башчысынын чечими менен Президенттин социалдык коргоо жана колдоо фондунан бөлүндү.

15-октябрь, 2016-жыл
Басып чыгаруу