Президент Алмазбек Атамбаев: "Борбор Азия университетинин ачылышы менен жаштарыбыздын сапаттуу билим алуусу үчүн мүмкүнчүлүк пайда болгонуна кубанычтабыз"

Кыргыз Республикасынын Президенти Алмазбек Атамбаев Нарын шаарында Борбор Азия университетинин кампусунун ачылышына байланыштуу куттуктоосун жиберди. Окуу жайдын ачылыш аземинде өлкө Президентинин куттуктоосун Премьер-министр Сооронбай Жээнбеков окуп берди.

Мамлекет башчысынын куттуктоо тексти:

«Урматтуу студенттер жана меймандар!

Кадырман кыргызстандыктар!

Бүгүн бизге кубаныч менен сыймык тартуулаган окуя болуп жатат. Биз Нарын шаарында Борбор Азияда биринчи аймактык жогорку окуу жайдын биринчи кампусун расмий ачып жатабыз. Бул жөн гана окуу жай эмес, бул  мыкты заманбап кесипкөй адистерди даярдай турган академиялык устаткана болуп саналат.

Борбор Азия университетинин ачылышы менен жаштарыбыздын эл аралык стандарттагы сапаттуу билим алуусу жана жогорку кесипкөйлүккө даярдоо үчүн жаңы мүмкүнчүлүктөр пайда болгонуна кубанычтабыз. Университеттин имараты  өзгөчө архитектуралык жасалгасы менен  Нарын шаарына заманбап жана кооз өӊ берип турат.

Кымбаттуу достор!

Кыргыз Республикасы көз карандысыздыкка ээ болгондон бери чейрек кылым турмушубуздун бардык чөйрөсүндө, анын ичинде билим берүү системасында жаңы белестердин мезгили болуп калды. Нарын шаарында Борбор Азия университетинин биринчи кампусунун ачылышы бул тармакта биргелешкен жетишкендиктерибиздин айкын үлгүсү болуп саналат.

Бүгүн биз билим берүү системабызды туруктуу өркүндөтүп жатабыз. Кыргызстан - КМШда жана дүйнөдө бюджетинен билим берүүгө 24 % бөлгөн бирден бир өлкө. Албетте, окуу жайларда чечүүнү талап кылган проблемаларды билебиз. Буга байланыштуу баарына жеткиликтүү сапаттуу билим берүү негизги милдет болуусун каалайт элек.

Борбор Азия университетине студенттер бардык региондон алардын лидерлик сапатынын жана окуудагы жетишкендиктеринин негизинде тандалып алынганы мага белгилүү. Улуу урматтуу Ага Хандын жардамы менен алыскы райондордон жана чакан шаарлардан студенттер үй-бүлөсүндөгү муктаждыктарына жараша кыйла финансылык колдоо алышты жана акчанын жоктугунан улам бир да студент билим алуу мүмкүнчүлүгүнөн ажыратылган жок.

Кыргыз Республикасы Ага Хан уюму менен өз ара ишенимге жана урматтоого,  социалдык-экономикалык жана гуманитардык кызматташтыкка негизделген өнүктүрүү боюнча диалогду туруктуу жүргүзүп келатат. Улуу урматтуу Ага Хан менен былтыр Брюсселде жана Бишкекте болгон жолугушуулар  өз ара кызматташтыкты өнүктүрүүгө кошумча түрткү берди.

Жалпысынан кыргыз тарап Ага Хандын Өнүктүрүү түйүнү менен кызматташтыктын деӊгээлине жана мазмунуна канааттанат жана андан аркы өнүгүш келечегине оптимизм менен карайт деп бекем ишендирем.

Урматтуу студенттер!

2016-жыл сентябрдан тарта силердин окууңардын алгачкы этабы башталды, силер ар башка тармактарда болочок лидер болууга зарыл билимдер менен жөндөмдөргө ээ болосуздар.

Кыргызстан – сейрек ролу бар өзгөчө өлкө. Биздин мамлекет  устат кадрлар менен бекемделүүгө тийиш.Өлкөбүздүн келечеги жаштардын колунда, ошондуктан сапаттуу кесиптик билим берүү прогрессивдүү жаштарды даярдоого өбөлгө түзүүгө тийиш.

Улуу урматтуу Ага Ханга,  бул жерде кандай болушу керек деген көп жылдык элесинен жаралган эмгеги баарыбыз үчүн белек болуп калган Ага Хандын Өнүктүрүү түйүнүнүн куруучуларына жана кызматкерлерине өзгөчө ыраазылык жолдойм. Бардык кыргызстандыктарды жана айрыкча Нарын облусу менен Нарын шаарынын тургундарын дагы бир жолу куттуктайм!

Борбор Азия университетине ийгиликтерди каалайм!

Мекенибиз Кыргызстанда тынчтык жана бакубаттык болсун!

Кыргыз Республикасынын Президенти          А.Ш. Атамбаев».

19-октябрь, 2016-жыл
Басып чыгаруу