Сайттан издөө
Сайттан издөө
Кыргыз Республикасынын Президенти

Президент Алмазбек Атамбаев Швейцариянын тышкы иштер министри Дидье Буркхальтер менен жолугушту

Бүгүн, 2015-жылдын 26-мартында Кыргыз Республикасынын Президенти Алмазбек Атамбаев Швейцария Конфедерациясына жасаган расмий сапарынын алкагында Берн шаарында Швейцария Конфедерациясынын тышкы иштер министри Дидье Буркхальтер менен жолугушту.

Жолугушуунун жүрүшүндө кыргыз-швейцариялык мамилелердин актуалдуу маселелери, ошондой эле түрдүү тармактарда, анын ичинде эл аралык уюмдардын алкагында өз ара аракеттенишүүнүн мындан аркы пландары талкууланды.

Президент Алмазбек Атамбаев менен Швейцария Конфедерациясынын тышкы иштер министри Дидье Буркхальтер кыргыз-швейцариялык саясый диалогду мындан ары өнүктүрүүгө, өлкөлөр ортосунда түрдүү тармактарда кызматташууну тереңдетүүгө макулдашышты.

Кыргызстанда алдыда боло турган парламенттик жана президенттик шайлоолорго тиешелүү маселелерге өзгөчө көңүл бурулду. Президент Алмазбек Атамбаев үстүбүздөгү жылы парламентке таза жана ачык-айкын шайлоо өткөрүү боюнча мамлекеттик органдар бардык күч-аракетин жумшап жаткандыгын белгиледи.

Биз үчүн таза жана ачык-айкын парламенттик шайлоолорду өткөрүү абдан маанилүү. Бул президенттик шайлоолордун алдындагы башкы репетиция болуп калууга тийиш. Эл эки жылдан кийин президенттик шайлоолор дагы ушундай эле таза жана ачык-айкын өткөрүлөөрүн билиши керек, - деди Алмазбек Атамбаев.

Өз кезегинде Дидье Буркхальтер Швейцария шайлоо процесстерин өткөрүүдө Кыргызстанга ар тараптуу колдоо көрсөтөт, ошого байланыштуу бир катар долбоорлор ишке ашырылат деп баса белгиледи.

Тараптар ошондой эле Украинадагы кырдаалга байланыштуу, Кыргызстандын интеграциялык процесстерге катышуусуна тиешелүү маселелер боюнча пикир алмашышты.

Жолугушуунун соңунда Президент Алмазбек Атамбаевдин катышуусу менен Кыргыз Республикасынын Тышкы иштер министрлиги менен Швейцария Конфедерациясынын Тышкы иштер министрлигинин ортосунда өз ара түшүнүшүү тууралуу Макулдашууга кол коюу аземи өткөрүлдү.

2015-жыл 26-март