Сайттан издөө
Сайттан издөө
Кыргыз Республикасынын Президенти

Президент Алмазбек Атамбаев Улуттук адабият күнүнө карата кайрылуу жолдоду

Мамлекет башчысынын кайрылуусунун тексти:

“Урматтуу мекендештер!

Бүгүн жергебизде Улуттук адабият күнү белгиленип жатат.

Ар бир элдин руханий маданиятынын жүзүн, жетишкен бийиктигин чагылдырган адабий чыгармалар жана улуу инсандар бар. Кыргыз улуттук  адабияты  жөнүндө сөз болгондо биринчи кезекте “Манас” эпосу аталат. Андан кийин Чыңгыз Айтматовду айтабыз. “Манас”  басып өткөн тарыхыбыздын энциклопедиясы болсо, Чыңгыз Айтматов элибиздин ХХ кылымдагы маданий гүлдөп өсүшүнүн туу чокусу.

Биз, кыргызстандыктар, элибиздин руханий байлыгы менен, адабиятыбыз менен  дүйнө элинин алдында сыймыктансак болот.

Улуттук адабият мамлекетибиз менен кошо  телчигип, өнүгүп-өстү. Элибиздин басып өткөн тарыхын, үмүтүн жана тилегин чагылдырып,  билим таратты, тарбия-таалим берди. Дүйнө таанымын кеңейтип, дүйнө элдеринин маданияты,  улуу акылмандар жана жазуучулар менен тааныштырды.  Элибиздин ички дүйнөсүн байытып,  жалпы улуттук маданияттын, искусствонун өнүгүшүнө бел болду.

Улуттук адабияттын калыптанып өнүгүшүнө жүздөгөн калемгерлер салым кошкон. Аалы Токомбаев, Түгөлбай Сыдыкбеков, Алыкул Осмонов сыяктуу залкар жазуучулардын чыгармалары аркылуу улуттук адабият бийик баскычка көтөрүлүп, классикалык деңгээлге жетти.

Акыркы жылдары жергебизде туруктуулук орноп, мамлекет  тынч эмгекке, руханий дөөлөттөрүн терең изилдеп, өнүктүрүүгө өзгөчө көңүл бөлө баштады. Мамлекеттик тилди өнүктүрүү боюнча конкреттүү кадамдар жасалды. Эми көркөм адабиятты өнүктүрүү, китеп өндүрүшүн жакшы жолго коюу дагы колго алынганы турат.

Дүйнө оомал-төкмөл болуп, айрыкча интернет күч алган мезгилде улуттук адабият алдында көп милдеттер турат. Жазуучуларыбыз жалпы журтка  чындыкты жеткирип, элдин үмүтүн, тилегин терең чагылдырып, жакшылыкка, жаратмандыкка жана өнүгүүгө шыктандырып турууга тийиш. Биз жаңы таланттарды, элибиздин демине дем кошуп, сыймыгыбызды арттырган жаңы чыгармаларды күтөбүз.

Биз, азыркы муундун өкүлдөрү, адабиятыбызды, маданиятыбызды жана ата-бабаларыбыздын  руханий дөөлөттөрүн терең урматтап, сыймыгына татыктуу болушубуз керек. Манас атабыздын башкы осуятын - көп этностуу Кыргызстандын биримдигин жана ынтымагын көздүн карегиндей сактап калууга милдеттүүбүз!  Ата-бабаларыбыз кыялданган күчтүү, көз карандысыз, гүлдөп өнүккөн мамлекет курууга тийишпиз!

Кыргыз Республикасынын

Президенти          Алмазбек Атамбаев”

2015-жыл 12-декабрь