Сайттан издөө
Сайттан издөө
Кыргыз Республикасынын Президенти

Президент Алмазбек Атамбаев айыл чарба жана мелиорация министри Турдуназир Бекбоевди кабыл алды

Кыргыз Республикасынын Президенти Алмазбек Атамбаев бүгүн, 9-мартта, өлкөнүн айыл чарба жана мелиорация министри Турдуназир Бекбоевди кабыл алды.

Жолугушууда Мамлекет башчысы жазгы айдап-себүү иштеринин жүрүшү, анын ичинде минералдык жер семирткичтерди жеткирүү, жеңилдетилген насыяларды берүү аркылуу айыл чарбасын каржылоо жана лизинг программаларынын турмушка ашырылышы тууралуу маалымат алды.

Турдуназир Бекбоев ошондой эле өлкөдө ирригациялык долбоорлорду ишке ашыруунун жүрүшү, жаңы сугат жерлерди пайдаланууга киргизүү жана алардын сугат суу менен камсыз болушун мындан ары жакшыртуу боюнча пландар жөнүндө баяндап берди.

Президент Алмазбек Атамбаев аймактарды жана бүт өлкөнү өнүктүрүүдө айыл чарба тармагынын мааниси зор экендигин белгилеп, жазгы талаа жумуштарын тийиштүү деңгээлде жүргүзүшү үчүн айыл чарба жана мелиорация министрлиги өлкө фермерлери менен элет эмгекчилерине бардык шарттарды түзүшү зарыл экендигин айтты.

2016-жыл 9-март