Сайттан издөө
Сайттан издөө
Кыргыз Республикасынын Президенти

Кыргыз Республикасынын Президенти Алмазбек Атамбаевдин Кыргыз Республикасынынмамлекеттик статистика органдарынын кызматкерлеринин күнүнө карата куттуктоосу

Мамлекет башчысынын куттуктоо сөзү:

“Урматтуу Кыргыз Республикасынын мамлекеттик статистика органдарынын кызматкерлери жана ардагерлери!

Сиздерди өзгөчө күн - Кыргыз Республикасынын мамлекеттик статистикасынын 90 жылдыгы менен куттуктайм.

Кыргызстандын мамлекеттик статистикасынын тарыхынын башаты өткөн кылымдын жыйырманчы жылдарынан башталат, анда экономикалык жана социалдык маалыматтарды топтоо жана иштеп чыгуу боюнча системалуу иштин башын баштаган алгачкы статистикалык органдар түзүлгөн.

Учурдагы мамлекеттик статистика – бул эл аралык тажрыйбаны ийгиликтүү пайдаланган, жалпы кабыл алынган эл аралык эрежелерди жана стандарттарды иш тажрыйбага активдүү киргизген жогорку деңгээлде уюштурулган маалыматтык система.

Республиканын статистиктери эсептин жана статистиканын колдонуудагы системасын сактап гана калышпастан, аны рыноктук экономиканын шарттарына ылайыктуу реформалап, таасирдүү мыйзам чыгаруу базасын камсыздап, статистикага көз карандысыз статус берип жана анын мазмунун сапаттуу жакшырта алышты.

Реформаларды жүргүзүү жылдары республиканын мамлекеттик статистикалык системасы дүйнөлүк статистикалык коомчулукка интеграциялоо жагына олуттуу кадам жасады.

Кыргыз Республикасынын Улуттук статистика комитетинин ишине масштабдуу баа берген бир катар эл аралык уюмдардын өкүлдөрү статистикалык көрсөткүчтөрдүн сапатын жана БУУ тарабынан кабыл алынган статистиканын негиз салуучу принциптеринин сакталышын тааныды.

Мамлекеттик статистиканын маалыматтарын өндүрүүчүлөр менен пайдалануучулардын ортосундагы өз ара аракеттенүүнү камсыз кылуу максатында Кыргыз Республикасынын Статистика боюнча кеңеши коомдун керектөөсүнө ылайык жигердүү иштеп, кайра байланышты жөнгө салуу ыкмаларын өркүндөтүшү керек.

Статистикалык комитетке ведомстволор аралык деңгээлде маалымат алмашуу жана административдик маалыматтарды колдонуу менен чектелбестен, комплекстүү изилдөөлөрдүн жыйынтыктарын тажрыйбада колдонушу маанилүү.

Расмий статистикалык маалыматтар башкаруу чечимдерин иштеп чыгууда жана кабыл алууда эң негизги ролду ойнойт, ал өлкөнүн жана анын региондорунун социалдык-экономикалык, демографиялык жана экологиялык абалы жөнүндө объективдүү жана анык маалыматтарды түзүүнүн булагы болуп саналат.

Кыргыз Республикасынын мамлекеттик статистика органдарынын кызматкерлерине кесиптик ийгиликтерди, ден соолук жана бакубатчылык каалайм.


Кыргыз Республикасынын

Президенти                                                                       Алмазбек Атамбаев”.

2016-жыл 29-апрель